Adela Balderas

Enpresen Administrazioan eta Zuzendaritzan doktorea Deustuko Unibertsitatean, Research Fellow Oxfordeko Unibertsitatean, MBA Executive eta Marketineko masterrak egin ditu Euskal Herriko Unibertsitatean eta Coaching Profesionaleko masterra Inesemen. Adelak, horrez gain, coaching profesionaleko ikasketak egin ditu New Yorkeko Unibertsitatean eta Stanfordeko Unibertsitatean (AEB) eta sorkuntzako ikastaroak Saint Martins Collegen, Londresen (Erresuma Batua).

Huete&Co enpresako kidea da eta Cámarabilbao University Business Schooleko, ESIC Business and Marketing Schooleko eta Basque Culinary Centerreko irakaslea. Azken horretan, masterreko programa bat zuzentzen du eta unibertsitatean ematen diren master guztietako coacha da. Halaber, zenbait unibertsitate nazionaletan irakasle gonbidatua da (Deustuko Unibertsitatea, Euskal Herriko Unibertsitatea, Mondragon Unibertsitatea, Madrilgo Unibertsitate Europarra), baita nazioarteko hainbatetan ere (Oxfordeko Unibertsitatea, Northumbriako Unibertsitatea, Erresuma Batua; Xiamengo Unibertsitatea, Txina; Ratisbonako Unibertsitatea, Alemania; École hôtelière de Lausanne, Suitza). Marketin, harreman publiko, gaitasun, motibazio eta pitch trainingeko aholkulari eta hizlaria da eta hotelen, gastronomiaren eta berrikuntzaren sektoreetako enpresetan kolaboratzen du, adibidez: Silicon Valleyko Imagine Creativity Centerren.

Amaia López de Heredia

Aholkularia, irakaslea eta kontsultaria da proiektu turistikoen plangintzan eta kudeaketan, eta 25 urte baino gehiagoko esperientzia du sektore horretan. Bere jarduera profesionaleko lehen etapa bidaia-agentzien sektorean eman zuen, eta, gero, kudeaketa turistikoko erakunde publiko-pribatuetan, harik eta, 2002. urtean, Akimo Proyectos Turísticos enpresa sortu zuen arte. Enpresa horrek ekitaldiak antolatzen eta aholkularitza turistikoa ematen du.

Turismo gastronomikoan aditua da, eta erakunde publiko zein pribatuentzako proiektuak garatzen eta koordinatzen ditu. Gainera, Arabako Errioxako ardoaren ibilbidearen zuzendaritza estrategikoaren, kudeaketaren eta garapenaren arduraduna izan da 10 urte baino gehiagoan. Garapen turistiko gastronomikoko zenbait plan ere idatzi ditu: 2010eko Euskadiko Turismo Gastronomikoa Bultzatzeko Plana eta ondoren egin zen eguneratzea, JDK Errioxako enoturismoaren estrategia, etab. Horrez gain, Basquetourren Euskadi Gastronomika Produktu Kluba sortu eta kudeatu du, ekitaldiak diseinatu eta antolatu ditu eta turismoa eta gastronomia sustatzeko ekintzak kudeatu ditu.

Carlos Escario

Carlos irakasle laguntzailea da IESE negozio-eskolan eta AEBko Notre Dame Unibertsitatean. Ohorezko irakaslea eta aholkulari exekutiboa da CEU Cardenal Herrera Unibertsitatean. Jarduera akademikoak egiten ditu San Telmo Nazioarteko Institutuan, Basque Culinary Centerren eta EDEM Enpresaburu Eskolan, eta prestakuntzako irakasle iraunkorra da Valentziako Unibertsitate Politeknikoan. GLP (Lidergo Globaleko Programa) enpresa globalen partzuergoko faculty kidea da Escario. GLPk Asian, Europan eta Ipar Amerikan ditu egoitzak. Irakasle bisitari gisa, irakaslea da San Pablo de Arequipa (Peru) Unibertsitate Katolikoko Lidergo Zentroan eta munduko beste hainbat instituziotan. International Academy of Management erakundeko kide ere bada.

Harvard Business School zentroan (Boston) ikerketa-programa bat egin du, eta ziurtagiria lortu du erakunde-psikologian eta giza ingeniaritzaren diseinuan Richard Bandler-ekin, Robbins Research-en.

Cesar Canovas

Cesarrek sommelier-ikasketak egin zituen, Bartzelonako Escola de Restauració i Hosteleria eskolan. 2000 eta 2007. urteen artean, Racó d'en Cesc jatetxean sommelier gisa aritu zen; geroago, 2008 eta 2014 artean, Monvínic jatetxeko sommelier-taldeko zuzendaria izan zen. Hainbat lehiaketa irabazi eta hainbat aintzatespen lortu ditu, besteak beste: Espainiako sommelier txapelduna izan zen 2002an eta 2005ean, Ruinart Lehiaketako Espainiako sommelier txapelduna 2004an eta Kataluniako sommelier txapelduna 2002an eta 2005ean. Kataluniako Gastronomia Akademiaren urteko profesional onenaren saria irabazi zuen 2004an, eta Gastronomiako Sari Nazionala 2011n. Gaur egun, Wineissocialeko hautapen-zuzendaria da, CETT-UBko irakaslea eta ardoaren eta gastronomiaren munduarekin lotutako hainbat enpresaren kolaboratzailea, adibidez: Monvínicena eta Caterdata Taldearena.

Daniel Willis

Daniel Willis Manchesterren hazi zen. Janaria, musika eta argazkilaritzarekiko zaletasun handia dauka, eta horrek azaltzen du jatetxeetan duen ezohiko eta sormenezko ikuspegia. 2008. urtean Londresera joan bizitzera, eta 3 urte eman zituen lanean Fergus Henderson eta Trevor Gulliverren jatetxean (St. John Bread and Wine). 2010ean, Danielek eta bere bazkide Johnny Smithek supper club bat sortu zuten, hau da, aldi baterako jatetxe bat, The Clove Club izenekoa. Lyle's jatetxeko Isaac McHale eta James Lowe sukaldarien laguntzarekin janari bikaina eta aparteko musika nahasiz, munduko aldi baterako jatetxe ezagunetako bat bihurtu zen. Toki gero eta interesgarriagoetan ekitaldi eta afari ugari antolatu ondoren, Young Turks izeneko bikoteak 6 hilabeteko egonaldiari ekin zion The Ten Bells pubean, eta kritika bikainak jaso zituzten. Danielek, bere bazkide Johnny Smith eta Isaac McHale chefarekin batera, 250.000 libera esterlina baino gehiago bildu zituen hurrengo proiektua finantzatzeko. The Clove Club behin betiko proiektu bezala finkatzea erabaki ondoren, Londresko jatetxe garaikide eta zirraragarrienen artean sartzea lortu du hirukoteak. Bertan, inguru lasai eta informalean eta Danielek berak hautatutako musikarekin, janari landua, zaindua eta dotorea zerbitzatzen dute. The Clove Club 2013. urtean ireki zuten, eta ordutik, mundu-mailako aitorpena lortu dute hainbat sariri esker: National Restaurant Awards sarien bigarren postua, zerbitzu onenaren saria (Service Award), munduko 50 jatetxe onenen arteko 26. postua eta Michelin izar bat (2014an).

Dario Méndez

Espainian ElTenedor bultzatu duen bazkideetako bat da Marcos Alves eta Alejandro Lorenzorekin batera, 10 urte baino gehiago daramatza jatetxeen digitalizazioan iraultza egiten, bai sektorearen bai erabiltzaileen heziketan fede osoa izanda. Ostalaritzaren digitalizazioa ez da etorkizuna, oraina baizik, eta bere helburua jatetxeei eskura dituzten tresna teknologikoak erabiltzen laguntzea da, aretoko kudeaketaren gainean kontrol handiagoa izan dezaten, Internet bidezko kanalak ireki ditzaten eta bezeroaren leialtasuna sareko ospearen bidez kudeatu dezaten. Gaur egun, arloko manager eta top chef manager eginkizunak betetzen ditu, 18 pertsonako talde batekin, eta erdialdeko eremuaren garapenaz arduratzen da, jatetxeen merkataritza-alderditik hasita, martxan jarri eta kontuen kudeaketara.

ElTenedorri buruz: TripAdvisorreko marka bat da, erreserbak egiteko sektoreko plataforma liderra Europan; 45.000 jatetxeko sare bat dauka eta hilean 16 milioi bisita baino gehiago jasotzen ditu. Plataforma horrek Frantzian eta Suitzan Lafourchette marka erabiltzen du, Espainian ElTenedor, eta Italia, Belgika, Portugal, Brasil, Suedia eta Danimarkan TheFork. Ingelesez, TheFork.com gisa aritzen da, Holandan IENS gisa eta Australian Dimmi gisa.

Icaro Moyano

Ícaro Moyano Díazek ia 20 urte darama ekonomia digitalaren arloan lanean, eta bere karrera Komunikazioa, Harreman Instituzionalak, komunikabide berriak, produktuaren diseinua eta negozio-estrategiarekin lotutako lanetan garatu du. Gaur egun, Wink TTD enpresan lan egiten du, Ikus-entzuleen Garapenaren arloko buru gisa. Bere zeregina edukiak banatzeko eta ikusleak gehitzeko estrategiak diseinatzea da, zenbait marka handiren eduki-proiektuetarako.

Joserra Calvo

José Ramón Calvo Zerbitzuetako zuzendaria da IXO Grupoko jatetxeetan, eta aretoko taldeen belaunaldi berriei bezeroen arretan bikaintasuna lortzeko prestakuntza emateaz arduratzen da. Mugaritzeko jangela-buru izan da 2003tik 2017ra, eta irakasle eta dibulgatzaile nazioarteko zenbait gastronomia kongresutan, hala nola Australiako Food & Wine festibalean, Madrid Fusión-en eta Host-en (Basque Culinary Center), bai eta ikastetxeetan eta Espainiako Jangelako Buruen Elkartean ere.

Joserrak Ostalaritza eta Turismoko goi-mailako teknikari-ikasketak eginez eta sommelier titulua lortuz abiatu zuen bere karrera, eta dagoeneko 25 urteko esperientzia du gastronomiaren munduan, Panier Fleuri eta Privilege jatetxeetako zuzendaria gisa, eta Arzak eta Akelarre bezalako establezimenduetan.

Denbora horretan, martxan jarri ditu jangelako arretarako formula berriak, askotan, diziplina artistikoak baliatuz; adibidez, dantza eta antzerkia. Hainbat sari irabazi ditu: besteak beste, Espainiako Gastronomia Sari Nazionala (2010), Más Gastronomia Saria (2013) eta Salsa de Chiles sarietako Epaimahaiaren Saria (2016).

Maria Calvo

Zazpi urte egin zituen eBay-n, Country Manager gisa, eta 9 urte marketin saileko buru zenbait korporazio handitan. Horren ondoren, sektore sozialera igaro, eta Espainiako Ashoka Social Entrepreneurs zuzendu zuen.

Gaur egun, Grupo Vips Espainiako jatetxe-enpresako Talentuaren Kudeaketa eta Erantzukizun Korporatiboko zuzendaria da.

Marta Fernández Guadaño

Enpresen Administrazioan eta Zuzendaritzan lizentziatua da (E-2), ICADE-Comillasko Eliz Unibertsitatean, eta 1996tik 2011ra kazetaritza ekonomikoko arloan lan egin zuen. 2005ean, gastronomiari buruz idazten hasi zen, eta 2011ko apiriletik aurrera hori izan zen haren lanbide bakarra, bizitza profesionala aldatzea erabaki baitzuen orduan. 2011n, Gastroeconomy aurkeztu zuen, enpresa-gastronomiari buruzko informazio-ataria, eta proiektu hori freelance kazetaritzarekin bateratzen du («Expansión», «Fuera de Serie», «Tapas», «Metrópoli» eta «Origen»). Basque Culinary Centerrekin elkarlanean aritzen da ekintzailetza- eta kudeaketa-gaietan.

Oskar Santamaría

Industria Diseinuko Ingeniaria da eta Produktu eta Zerbitzu Elkartuen Diseinu Estrategikoko Masterra du. DOT S.coop (www.feeldot.com) Berrikuntza eta Diseinu agentziako kide da eta «Gastronomia eta Diseinua» eta «Joera Berriak eta Berrikuntzak Zerbitzuan» ikasgaiak irakasten ditu Basque Culinary Centerren.

Oskar DOT-eko Diseinu Estrategikoko arduraduna da eta bere lanaren helburua sektore desberdinetako enpresei -ORBEA, AQUARIUS, SUEZ edo PERNOD RICARD, esaterako- berrikuntzaren kudeaketan, zorroaren garapenean, bezeroaren esperientziaren definizioan, produktuen diseinuan eta markaren nortasunaren sorreran laguntzea da.

Tinuca Maestro Medrano

Tinuca Kudeaketa Komertzial eta Marketinean lizentziatua da, ESIC Business Marketing School zentroan; DSTAgE jatetxeko zuzendaria da ireki zenetik, eta Club Allard jatetxekoa ere bai, 2012az geroztik.

Ibilbide profesionala Oracle Iberican hasi zuen, informazioaren teknologien Estatu Batuetako multinazionalean, Marketing Manager eta Negozioaren Garapenaren arduradun gisa Aliantza Estrategikoen sailean, eta Marketin zuzendaria izan zen INDITEX taldeko enpresa batentzat Espainia eta Latinoamerikarako.

Sergio Gil

Gastropologoa, prestatzaile unibertsitarioa, aholkulari gastronomikoa eta Taberna y Cafetín taldeko zuzendari exekutiboa da. Bartzelonako Jatetxe Jasangarriak elkarteko lehendakaria ere bada gaur egun.

Historia Garaikidean eta Gizarte Antropologian lizentziatua da, Bartzelonako Unibertsitatearen bidez. Halaber, irakaskuntzarako gaitasun-ikastaroa (IGI), Hiri Arkeologiako graduondo bat eta Etnografia Kulturaleko master ofizial bat ditu eginak.

Bartzelonako Unibertsitateko Hiri Antropologiako Sailerako lan egin du, SOZIABILITATEA TABERNAN gaiari buruzko ikerketa-proiektu bat koordinatuz.

Diego Sandoval

Sandoval anaien artean erdikoa da Diego, Mario gazteagoaren eta Rafael zaharragoaren erdi-erdian kokatuta. Diegok «tabernari» bezala definitzen du bere burua, «eta harro!». Ostalaritzaren gaineko ezagutza izugarria du pilatuta, eta pasioz bizi du sektorea, familiaren negozioan metatutako 30 urtetik gorako esperientzian oinarritutako hospitalitatea eta kudeaketa gaitasuna ardatz. Pentsa, 13 urte besterik ez zituela hasi zen lanean familiako negozioan.

Ostalaritzarekiko bokazioa, emozioa, Coque jatetxeak lortutako arrakastaren erritmoan sortzen joan da Diegoren baitan. Hala, gaur egun bi Michelin izar dituen jatetxea hazten zihoan heinean, Diego bere lana dibertsifikatzen hasi zen, eta, jangelako buru huts izatetik, zerbitzu-protokoloak diseinatzera –zorroztasuna, sofistifikazioa eta garaikidetasuna ardatz– eta Coque markaren enpresa-kudeaketaz arduratzera ere igaro zen.

Hori horrela, Diegok, egunero-egunero, lan bikoitzari egiten dio aurre egun. Alde batetik, Coque jatetxeko zerbitzuaz arduratzen da, estilo elegante, partikular, dinamiko eta aurrera begirakoa ardatz, xehetasun bakoitzean, ñabardurarik txikienean, «nabaritzen ez den» perfekzioa bilatuz. Bestetik, Coque taldearen alderdi enpresarialak diseinatu eta kudeatzen ditu. Taldearen zabalkuntza zuzendu eta operazio enpresarialak antolatzen ditu.

Zehazki, Coqueko gerentea eta giza baliabideetako zuzendaria da Diego. Taldeak ekitaldiak egiteko erabiltzen duen La Romanée finkaren zuzendaritzaz arduratzen da. Baita Sanhuer taldearen kudeaketa globalaz ere. Sanhuer taldean, Coque jatetxeaz eta La Romanée finkaz gain, Food Concept aholkularitza eta kanpo catering enpresa eta Dulcemanía ekitaldi gastronomiko handietan eta sukaldaritza gozoan espezializatutako aholkularitza enpresa ere badaude.

Gaur egun, bere ibilbide oparoari esker, erreferentziazko profesionala da zalantzarik gabe Diego Sandoval ostalaritzaren sektorean: primerako zerbitzu akats gabe eta pertsonala oinarri, Espainiako jangela-buru onenetakoa bihurtu da. Horren erakusgarri, 2016an, Jangelako Buru Onenaren Gastronomiako Espainiako Saria lortu zuen.

Itziar Rodriguez

Itziar Rodriguezek Irlandako Fitzpatrick bost izarreko hotelean izan zuen lehen kontaktua ostalaritzaren sektorearekin, jangelako aprendiz gisa. Ostean, Morels izeneko jatetxe txiki batera jo zuen lanera. Lau urte eman zituen bertan, sukaldaritzarekin itsuki maitemintzera iritsiz. Jatetxeko bigarren maître izatera heldu zen.

Espainiara itzulita, El Poblet taldeko jatetxeetan hasi zen lanean, ostalaritzaren beste arlo oso ezberdin bat ezagutzeko aukera izanez: jatetxe taldearen kudeaketan eta administrazioan murgildu zen buru belarri.

Azkenik, Fernando P. Arellanorekin batera, Zaranda jatetxea ireki zuen Madrilgo San Bernardino auzoan. Hamaika hilabete besterik ez zituzten behar izan euren lehen Michelin izarra lortzeko.

Jarraian, Zaranda jatetxea Madriletik Mallorcara lekualdatzea erabaki zuten, zehazki Hilton Sa Torre Hotelera. Mallorcako sukaldaritzan euren leku propioa bereganatzea lortu zuten berehala, bertara iritsi ziren urte berean Michelin izarra berrituz. Hilton Sa Torre Hotelean bi urte eman eta gero, 2012an berriz ere Zaranda jatetxea lekuz aldatu zuten, Mallorca bertako Castell Son Claret Hotelera. Bertan jarraitzen dute egun.

2015eko azaroan, gainera, bigarren Michelin izarra lortu zuen Zaranda jatetxeak. Ez hori bakarrik, 2016ean, Fernando eta Itziarrek bigarren proiektu bat ere jarri zuten abian: Puerto Portals kirol-portu ezagunean kokatutako Baiben jatetxea.

Asun Ibarrondo

Asunek 1966an ekin zion ostalaritzako ibilbideari, 14 urte baino ez zituenean. Orduz geroztik, hainbat jatetxetako jangeletan egin du lan maitre, gerente eta zuzendari gerente moduan. Gaur egun, Michelin izan bat eta bi Repsol eguzki dituen Boroa jatetxeko zuzendari gerentea da. 2008an, jangelako zuzendari onenaren Euskadi saria jaso zuen, Boroan egindako lanagatik.

Gorka Atorrasagasti

Ikasketak Donostian egin ostean, 80ko hamarkadaren erdialdera Madrilera joan zen, Harreman Publikoak ikastera.

Urteetan Madrilgo gauetako ikono izan zen Hanoi establezimenduko Harreman Publikoetako zuzendari izendatu zuten 1987an. Ondoren, beste leku batzuetan aritu zen zuzendari eta 1992an, Callaoko Xenon diskoteka ezaguna ireki zuen. Horrez gain, Madrilgo hipodromoko udako denboraldiak eta taberna famatu batzuk zuzendu zituen, Archy eta Bocaccio.

1997an, Pedro Trapote enpresaburuak Madrilgo Pachári beste bultzada bat emateko kontratatu zuen, eta Barceló antzokiko diskotekaren unerik gorenak bizi zituzten.

1999. urtean, gaueko aisialdia alde batera utzi eta ekitaldiak antolatzeko enpresa bat sortu zuen. Bere ahalegin guztiak jarri zituen proiektu berri horretan, zeina oraindik aktibo dagoen eta mota guztietako ekitaldiak antolatzen dituen.

Urte horretan bertan, Kike Sarasola eta Carlos Marrero lagunekin batera, Madrilen hotel-kontzeptu berri bat jartzeko proiektu bat sortu zuen –2001ean gauzatu zuten–. Hotelen arloan abiarazitako lehen esperientziak arrakasta handia lortu zuen eta, ondorioz, 2004an, Room Mate Hotels katea sortu zuten. Gaur egun, arrakastaz beteriko garaia bizi du, eta hotel-sektorean zabaltzen ari da.

Elsa Gutierrez

Annua talde gastronomikoaren maitre sommelierra da. Ondo berezitako hiru kontzeptuk osatzen dute taldea: Annua, besteak beste bi Michelin izar eta Repsol Gidako eguzki bat dituen jatetxe gastronomikoa. Nácar By Annua, Óscar Callejaren sukaldaritza ahalik eta publiko gehienari gerturatzeko asmoz 2013an sortu zen bistroa. Eta Mexsia Santander, Mexikoko eta Asiako sukaldaritzak fusionatzen dituen gastropuba, Europan hori egin zuen lehena, eta Santanderren ireki zena 2014an. Michelin izarrak dituzten beste jatetxe gastronomiko batzuetan lan egin du; tartean, El Serbal eta El Nuevo Molino jatetxeetan. Etengabe prestatzen ari da, eta gaur egun Jatetxe Zuzendaritzako eta Ostalaritzako F&Bko Masterra egiten ari da Gastrounin. Gainera, sommelier-ikasketak egin ditu Espainiako Dastatze Eskolan, bai eta ospakizunen antolaketa, protokoloa eta coachinga ere, besteak beste.

Argi dauka jangelak asko duela eskaintzeko bezero bakoitzak bizi duen esperientziaren barruan, eta egunero gauzatzen du proposamen hori gastronomikoan. Jangelako zerbitzu soil eta txukuna eskaintzen du, eta mimoz eta arretaz zaintzen ditu xehetasunak. Horri esker, herrialdeko kritikari garrantzitsuenek bere eta jangelako taldearen lana aintzatetsi dute: Annuari buruz hitz egiten duten artikulu guzti-guztiek aipatzen dute zeinen bikaina den Elsak zuzentzen duen jangelako zerbitzua.

Bere esperientzia eta egile-jangelaren kontzeptua defendatzeko bere modu pertsonala urtero partekatzen ditu hainbat kongresu gastronomikotan eta ikasketa-zentrotan, eta Óscar Calleja chefarekin batera egoten da horrek Espainian nahiz Espainiatik kanpo ematen dituen aholkularitza gastronomiko guztietan.

Rafa Zafra

Gotanegra familiak aspalditik du itsasoarekiko pasioa; zehazkiago, 1895etik, orduan hasi baitzen Dionisia Marco (àvia Nísia) Sant Pere de Rosesko plazan arraina erosten, gero, Figueresera oinez joan, eta han saltzeko. 120 urte eta bost belaunaldi igaro dira, baina gotanegratarrek oraindik ere Rosesko portuan erosten dute arraina.

Rafa Zafra chef andaluziarrak ondo baino hobeto ezagutzen ditu itsasoko produktuak, eta esperientzia handia du sukaldari-lanetan Adrià anaiekin lanean aritu eta gero. Gaur egun, Heart Ibizako chef exekutiboa da, eta ESTIMAR zuzentzen du, Anna Gotanegrarekin batera, alegia, bosgarren belaunaldiaren ordezkariarekin batera.

Gure bezeroak eta Creus lurmuturra estimatzea, horra hor gure helburua, Born auzoko txoko honetan zoriontsuak izan daitezen. Horretarako, gure esperientzia eta itsasoko produktuekiko sentitzen dugun pasioa eskainiko dizkiegu.

Pedro Ballesteros

MW, Master of wine. Nekazaritzako Elikagaien ingeniaritzako ikasketak eta Mahastizaintza eta Enologiako masterra egin zituen Madrilgo Unibertsitate Politeknikoan. Belgikan, WSET diploma eskuratu zuen; Alemanian eta Austrian, Weinakademiker ziurtagiria; eta Londresen, Masters of Wine Institutuko kide bihurtu zen. Zutabegilea da Planeta Vino (Espainia), La Libre Belgique, De Morgen eta Dernière Heure (Belgika) argitalpenetan, eta aldian behin idazten du Decanter (Erresuma Batua), Selectus Wines, elmundovino.com (Espainia) hedabideetan, eta Suitza, Italia, Frantzia, AEB eta beste herrialde batzuetako zenbait komunikabidetan ere.

Guillermo Cruz

Sommelierra. Mugaritz jatetxeko (Gipuzkoa) sommelierburua. Espainiako sommelierrik onena 2014an. Espainiako cava-sommelierrik onena 2015ean. Espainiako sommelierrik onenaren Ruinart Saria 2015ean. Urteko sommelierraren sariaren irabazlea 2014an, Mercados del Vino y la Distribución elkartearen eskutik. Sommelier onenaren Excelencias Gourmet sariaren irabazlea 2015ean. Urteko sommelierraren Gourmets saria. Advanced Sommelier maila Court of Master Sommelier elkartearen arabera (Master Sommelier mailaren aurreko kategoria). Arima duten ardoen maitalea.

Ramon Francàs i Martorell

Kazetaria. Kazetaritzan lizentziatu zen Bartzelonako Unibertsitate Autonomoan, eta 30 urte baino gehiago daramatza lanean hainbat komunikabidetan. La Vanguardiako korrespontsala da Penedès eta Garraf eskualdeetan 1989tik. Diari de Vilanova egunkariaren eta Vi-Franc blog arrakastatsuaren zuzendaria izan zen. Mahastizaintza eta ardogintza dira bere espezialitateak, eta cavaren bertuteak eta gastronomiarekiko harmonia ondo baino hobeto ezagutzen ditu. Komunikabide espezializatuekin lankidetzan aritzen da (Cupatges, Planeta Vino, etab.).

Silvia Culell

Sommelierra eta kazetaria. Bartzelonako Unibertsitate Autonomoan kazetaritza ikasi ostean, zenbait komunikabidetan lanean aritu zen, besteak beste, TVEn. Betidanik izan zuen ardoarekiko pasioa eta, azkenean, bere ogibidea edari horretan ardaztea erabaki zuen, CETTen sommelier-ikasketak eginda. WSETeko Wine and Spirits kategoriako zenbait maila ere egin zituen. Ordutik, proiektu ugaritan parte hartu du; esate baterako, Wineissocial-en. Bertan, edukien arduraduna eta sukaldaritzako aholkularia da 2014tik. 2017az geroztik, gainera, Cavaren Kontseilu Arautzailearen laguntzailea da: prestakuntza ematen du unibertsitateetan eta edukiak hobetzen ditu.

Anna Gotanegra

Eskualdean arrantzarekin lotua handia duen Gotanegratarren familiakoa da Roses herriko Anna Gotanegra.

1895ean sortutako enpresa bat eta familiarentzat arrantza egiten duen ontzidi bat du leinuak, eta haren bosgarren belaunaldiaren ordezkaria da Anna.

Familiako enpresan lan egin eta Mexikon aldi batez bizi ostean, Espainiara itzuli zen, bere bikotea den Rafra Zafra chefarekin batera proiektu guztiz pertsonal bat abiarazteko: Bartzelonako el Born auzoko Estimar jatetxea, azken bi urte eta erdian Annak zuzendu duena.

Pedro Bonet Ferrer

Cavaren Kontseilu Arautzaileko presidentea. Ekonomia Zientzietan lizentziaduna Bartzelonako Unibertsitatean (1968). Familia-enpresan hasi zen lanean (Freixenet). Bertan garatu zuen bere lan-ibilbidea, hainbat sailetan arituz, 1981ean Marketin eta Komunikazioko zuzendari izendatu zuten arte. Gaur egun Freixenet taldeko kontseilaria da, eta talde horretako Henri Abelé enpresako zuzendaria. 2013tik Cavaren Kontseilu Arautzailearen presidentea da, eta bere agintaldian lorpen ugari erdietsi ditu, besteak beste, Paraje Kalifikatuko Cavaren kategoria berria sortzea.

Francisco González López

Cavaren Kontseilu Arautzaileko aholkularia. Las Pedroñeras herrikoa, nekazaritzarekin eta abeltzaintzarekin lotutako familia batekoa da. Ingeniaritza Agronomoa ikasi zuen Madrilen eta, segidan, ibilbide profesionalari ekin zion mahastizaintzaren eta ardogintzaren sektorean. Mahasti eta upategiak aztertzeko lantaldeak zuzendu zituen, jatorri-deitura lortzeko prozesu ugaritan (Ribera del Guadiana, Ribera del Duero, Tenerifeko zenbait jatorri-deitura). Espainian ekoitzitako ardo apardunen kontseilu arautzaileko arduradun teknikoa eta kontrolaren arduraduna izan zen. Cavaren jatorri-deitura sortu zenean, 1991n, bertako zuzendari tekniko izendatu zuten, eta lan horretan jardun zuen joan den urtera arte. Gaur egun, Cavaren jatorri-deiturako zenbait proiektutako aholkulari teknikoa da.